قصيدة الشاعر/ عواد جازي العنزي بالعقيد / محمد الدبلان

ياراكب اللي كل مازاد ممشاه=يزود عند اللي يسوقه خلاته
من نوع لاند كروز كل تمناه= سلب قلوب الناس بمواصفاته
جا من مصانع طوكيو وستلمناه=من الوكيل المعتمد مشتراته
لوهي كثيره قيمته ماتغالاه=لانه فريد النوع وميزاته
اللون لامني بغيت اتحلاه=لون البرد ليا هله مخيلاته
شكل البدي جذاب اسفله واعلاه=ومع زين شكله جودة محركاته
ومكينته مابه بغيره مساواه=قوي عزم ويعجبك في ثباته
من كثر ماهم متقنين مزاياه=ثلثين سكان الوطن من هواته
هو منوة اللي ضاق صدره وسراه= يلقابه الساري مناه وطراته
مع الوعر والقار يعجبك ممشاه= من غير نوعه محد سوا سواته
اليا عطاء الفرجه وسواقه أعطاه=الارض تقصر لاوطته كفراته
اليا حده السايق لمشين على اقصاه= كنه الاباتشي وحدة من خواته
له هيبت لا جيت أحلي حلاياه= هيبة وزير واثق به ولاته
راعيه من زود الطرب يرفع أغناه= هذا هوى باله وذي مناته
متهقوي بالجيب والجيب هقواه=يوصل له المطلوب قبل فواته
ياسايقه عده لديرت هل الجاه=وخص الرفيق اللي لفتنا دعواته
نبي نزور اللي على الطيب مرباه=اللي يبين باللوازم ثباته
محمد الدبلان ياحي طرياه=أدعي عسى ربي يمهل حياته
يفز في وجه المسير ليا جاه=يعجبك في زين النباء وتحياته
وماهي غريبه تفعل الطيب يمناه=دام الشهامه والكرم من سماته
طبع المراجل والوفاء من مزاياه=ماهو من اللةقفته بشهواته
انا امدحه بالفعل ماهي مبالات= وما يمدح الرجال غير بصفاته
رجال متعلم وضابط وله جاه=الطيب والمنصب جمعها بحياته
ماهو من اللي يغز خشمه بعمياه=يحسب النجوم تدوم له لا مماته
بعض الرتب على الرجاجيل مدعاه=راعيها مضرب لردا من رداته
ماغير يباهي في نجومه مباهاه=مايدري ان طيب الرجل هو حلاته
ماكسب منها الطيب بأمور دنياه= مازودته الا بكثر الشماته
ولا محمد ياعسى الاش يفداه= كل من يعرفه يمدح التصرفاته
ولي الشرف لا جيت مثله وشرواه=وشاركة بالاشعار بمناسباته
لانه من الرجال الكرام المسماه=رجالهم بالطيب يقضي حياته
جموع الزميل اللي على الطيب مبداه= وشجعان كان الحرب دارةرحاته
عاداتهم يثنون خلف المخلاه=وعدوهم مايهتني في مباته
من روس سنجاره هل الصيت والجاه=امجادهم ماتنعرف منتهاته
تاريخهم محد من الناس ينفاه=قبل القبايل يجمع الله شتاته
يقودهم شيخ على العز مرباه= شيخ قليل من يسوي سواته
شيخ على الطولات يتعب مطاياه=ماهو من اللي شيخته في عباته
ابن ثنيان اللي حميده سجياه=لربعه وضيفانه كثير حسناته
وهنا وصلت القاف حده ومنهاه=والهرج لامن زاد قلت حلاته
وصلو على اللي خصه الله وارضاه= نبينا اللي كمل الله صفاته