ياللي تقول عجي من وين ؟ ياخبيل

ياللي تقول عجي من وين ؟ ياخبيل = تر. مسكنه بين الضلوع الحنايا
حنا عيال عجي والعزوة ازميل = وفعولنا بالطيب ماهي خفايا
ياناشدن عنا ترى نذبح الحيل = ابخبرك واهديك علمي هدايا
ربعي هل الردات ربعي هل الخيل = ربعي ليا عدت فعول الطنايا
اميرنا بشير اللي قام بالشيل = اميرنا اللي مايهاب المنايا
اميرنا بشير و ناصر مداهيل = لضيوفهم واللي نصوهم عنايا
آل العجي صعبين ماهم تساهيل = البدو واللي ساكنين القرايا
دخيلهم يانس بزين النعاليل = ويسلأ بزينين العمل والسجايا
ويوم المغازي والسيوف المساليل = ياما غزوا وياما خذوا من سبايا
كم مرتن غاروا على الجيش بالليل = وهجوا عداهم مثل روس العطايا
عدوهم لو كان جيشه كما السيل = يرجع كسير إن كان فيهم بقايا
ياما وياما فرقوا خيل عن خيل = وخيل العدو تارد وتصدر ضمايا
اللي يعاديهم يشوف الغرابيل = يذوق من نار المعارك بلايا
وياما وياما طوحوا من محاحيل = ورووا عدول البل وصدرت ملايا
حنا بنينا المجد غصبن بتذليل = غصبن على المبغض خبيث النوايا

تمت /
الشاعر / راكان بن دواس المشيط