شرف الدار عبد الله وطاب الوفاق/ للشاعر خالد المشيط

شرف الدار عبد الله وطاب الوفاق=ورزَّت أفراح حائل في عزيز لفا
مرحبا بك عدد رمل النفود الدقاق=أو عدد ما تهز النود قشع الشفا
أو عدد ما غشى الليل الروابي وساق=عن عبير الصباح اللي نهاره ضفا
أبدع القاف من حب وزود إشتياق=في محياك يا راع الصخا والوفا
حبنا لك صريح ما يخلطه نفاق=مثل نقش الكتابه فوق صم الصفا
نبدع الشعر في مدحك بوجه طلاق=ونعتبر كل ما قلناه بكم ماكفا
حيثك أنت المليك اللي بك المدح لاق=و أبو من لا له أب وكافل الضعفا
و أنت تصغي براسك للضعيف الهقاق=وتعطي المال عطف من ضمير صفا
وأنت عبد الله المعروف بدر الأفاق=وأنت ذخر العروبة كان يبس الشفا
إلي حصل فيه يوم مثل يوم العراق=تزبن الناس جانبكم وبكم الكفا
كل الأقطار تشكركم على أوسع نطاق=ولا على الناس منكم يا أبو متعب خفا
أنتم أهل السياسه والظفر والوفاق=وأنتم أهل المروة والعطا والعفا
للمصاحب عسل سيَّال حلو المذاق=وللمعادي جحيم ضوها ما طفا
وأنتم أبطال نجد وبطشكم ما يطاق=ومن جفاكم يباشره الجفا والهفا
وأنتم أهل السيوف اللي تقص العناق=عند هدي الكتاب وسنة المصطفا
وحكمكم ورث جدان مهو باتفاق=ولا بطرق انتخاب ولا بعون حلفا
بالسيوف البوارق مرسلات الشعاق=مطوعات العنيد الطاغي المرجفا
نفتخر باسمكم يا طيبين العماق=وأنتم أهل القيادة بالعلن والخفا
فات خمسين مع خمسين عام طباق=تنعم المملكه بأمن و أمان ودفا
والمسافر يسافر ما يلاقي ضياق=كن معه العيون الساهرة تشرفا
ما فقدنا المؤسس حين حل الفراق=حيث قاموا مقامه بالمكان خلفا
قادوا الشعب من عز لعز يراق=يوم بعض الشعوب تقاد للموسفا
نطلب الله يعزك يا بعيد المهاق=ويحفظ الله ولي عهدك عضيد الوفا
ويجعل الشر عنكم ينتحي بالفراق=ويجعل النصر صاحبكم بعز وعفا