عديت يا متعب طويل تعلى / للشاعر خالد المشيط

عديت يا متعب طويل تعلى=طعس على الدار البعيدة مويقي
قعدت في راس الطويل اتحلى=ابي اتفضى وزاد صدري بضيقي
وطبيت كن الكبد به شوك سلا=والدمع حرق بالعيون اتحريقي
على حبيب بالمحبة تغلى=مر معاديني ومر صديقي
يا شاف بي غيض ضحك واسفهلا=وليا بغيت الوصل سد الطريقي
علمي بهم باول رجب حين هلا=جاني على جال المحيط الغميقي
و اقفيت واقفى ما دري وين ولى=و انا على شوفة قباله شفيقي
الصاحب اللي للضماير يتلا=تل الغروب الصادرة من غريقي
عليه روحي طرّفة مابقى الا=سلك مثل سلك الاباري دقيقي
ابو فليل فوق ردفه تدلى=ذيل العبية عقب رد الوسيقي
والعين عين اللي بالاقفار فلى=خشف من العفر الادامي طفيقي
والنهد توه بالحشا مستقلا=والخد يشبه للجنيه العتيقي
يا بو شقا حار القدم بي وزلا=واخاف يرميني بدو سحيقي
اطلب عسى المجمول مهو بحلا=اللى دعى صندوق قلبي خريقي